لأجلك

 

اليوم حطيت لكم عشاء رومانسي ونتمنى يعجبكم

 

 

 

 بالطبق الرئيسي

الصلصلة:شحرت بصلة كبيرة مع درس ديال التوم فالزيت
وضفت الملح والبزار حتا تشحرت وضفت الشومپينيون
ومن بعد ضفت زعفران الملون مع 2 مطيشات محكوكين ومعلقة ديال مطيشة الحك مع شوية ديال الهريسة (اختياري)

الكفتة:خديت الكفتة ضفت خلطها مع:نص بصلة محكوكة+درس توم محكوك+ملح ابزار+ربيع+سكينجبير+كمون+تحميرة+2معالق كبار ديال بودرة اللوز وبيضة
وخلطت الكل وشكلت بيهم قليبات ستفتهم فصنية ديال الفرن مدهونة بالزيت ودخلتهم يطيبو

 

 

السلاطة

 

 

ف إناء تنحطو روز مسلوق ونضيف ليه سمك معلب وذرة قليل من الملح ابزار

جوج ملاعق مايونيز نخلط الكل ونوضعوه في قلب على شكل قلب كما في الصورة نوضعو فوق القلب مايونيز وكتشب في  الجوانب و  الجزر محكوك ونكملو التزيين كما هو مبين في  الصورة  

 

 

 

 الديسير 

 خديت فلان عادي ديال الفريز وجدتو وعملتو فقالب علا شكل قلب
ملي تجبن مزيان قلبتو فطبسيل
وطليت الجناب بكراميل ولسقت فيه اللوز مهرمش وزينت الجناب بلفريز
اما الوجه طيبت نص كاس ديال الما مع نص كاس ديال السكر وضفت عليه تقريبا نص رابعة ديال الفريز مطحون
ملي بدا يغلا ضفت عليه ورقة ديال الجيلاتين
وغي دابت طفيت عليه
وغي بدات تبرد شوية صبيتها علا وجه القلب ودخلتها للتلاجة
وفالتقديم زينتها كيما موضح فالصورة

 

 العصير 

 نعطيكم المقادير كتابة
خديت الليمون معصور وخدي الفريز مقطع هو والخوخ وطحنت الكل مع السكر حسب الدوق

هذه هدية لكل الزوجات واتمنى أن يعجبكم هذاالعشاء الرومانسي

 

 بالصحة والراحة